掟壞人

上星期六因賀朋友禮生日，成班走左去金鐘PP Dan Ryan食飯。這位禮兄同我都好鍾意食美國式餐廳，所以佢呢幾年生日黎黎去去都係Ruby Tuesday，Dan Ryan，又話者係Outback呢幾度慶祝。

我鍾意呢類美國餐廳既原因係每次去都可以俾你感受到咩叫"大吃大喝"，因為佢每碟菜既serving都好大，飲品又有得免費添飲，所以每次都食到捧住個肚走。而且座位舒適又冇趕住翻枱既感覺，所以如有三五幾個朋友gathering呢度都係必然首選。

今次點既菜都係食慣食熟，不外乎Caesar Salad，Lasagna，Buffalo Wings，Ribs之類，可謂無甚驚喜，但都食得好enjoy。由於顧住傾偈，赫然發現枱上有兩碟意份已經清哂，實在為之氣憤。到最後叫Dessert時，本來我係揀左Brownie，但朋友祖竟然講左一句"唔好啦，呢隻咁既brownie好鬼甜，簡直係鬼佬蓮蓉!!"，此語一出全場爆笑，相信都會成為我地group人既經典，當然最後都o係佢強烈抗議下冇叫到。

Dan Ryan三間分店我都食過，呢間service就算幾好，而尖沙咀果間因人多關係，如果book八點要9點半交枱，食呢d野點叫人個半鐘食完呀?? 有d離譜。如果要我排響香港有既5間同類型連鎖餐廳，我會咁排:

第一位: Ruby Tuesday - 食物質素同service都keep住幾好，最衰海港城間舖執左，所以少去左。呢間舖d位好舒服好有privacy個view又靚，執左真係可惜。

第二位: Dan Ryan - 整體都幾好，但要限人時間交枱(尖咀店)就真係有少少drawback。

第三位: Outback - 基本上都ok，但食物選擇較少，service亦冇前兩間咁pro。

第四位: Fat Angelo - 呢間衰唔穩定，蘇豪店同尖沙咀店不論食物或服務質素都可以用天淵之別黎形容，如果想去，奉勸大家唔好去尖沙咀店，盞成肚氣。

第五位: Shooters 52 - 以前就幾好，而家執下又一間，食物水準大不如前喇!!

最後當然唔少得響門口影張相呢個指定動作啦。

舊同事聚舊一夜

今晚跟舊公司同事去左旺角的潮樓聚舊食飯，當中有d都經常見面雀戰，有d就好耐都冇見過。當中有位舊同事係o岩o岩響加拿大返香港，仲記得當年佢生BB，大家都去左西營盤一間醫院探佢，估唔到而家她的小朋友已經入讀小一，時間過得真快!!

席間最大的話題竟然是....... 脫髮!!! 原來有幾位男同事都試過唔同既藥物或生髮水，呢d資料真係要收集定先。

呢間潮樓我都去過好幾次，水準算係普普通通，價錢亦唔算貴，但我地離開時(約九點半)竟然仲有人等位，係咪真係好食到咁呀???

夏日白色恐怖 ---> 3號拎港姐冠軍!!

今屆港姐有幸去現場觀戰，一行五位 Pageant Fans 帶住興奮的心情入場，離場時卻心情異常低落，因為 TVB 竟然揀左個咁既冠軍出黎!!!!

現場直擊：

7:45pm - 入緊場，見到一班港生，應該係少年組加最老果個12號，除2號較有睇頭外，其他都不值一提。

7:55pm - 仲有5分鐘就開始港姐，今屆個台都幾GRAND，幾多High-Tech野，兩個大螢光幕響台兩側，再加一頂巨型后冠響中間，非常搶眼，而嘉賓都魚貫入場。

8:10pm - 司儀講一大輪野港姐終於出場，今年勁抄環姐同American Next Top Model，扮叫D港姐響後台出場，但D CATWALK都行得幾有型。

8:20pm - 首先係環保同玩具兩Parts，今年既道具設計幾花心思，呢隻玩具鴨仔都幾cute。D佳麗對答好普通，2號拎支咪都震震地，戥佢擔心。其實好明顯呢Part既問題佢地之前係已經知，點解都可以答到唔知點咁??

8:50pm - 林峰同徐子珊表演，林峰D Fans嗌唔停，勁煩。中間個台升起俾D佳麗行空中catwalk，現場睇難度係幾高，因為係差唔多成個台"戙"起。但最後原來得4個佳麗行，有D搵笨。

9:05pm - 泳裝環節，大部份佳麗錄影片段影得好好，好有飄逸感覺，但8,13,16仍然Keep住咁衰。現場打分故障多多，成日打唔切分，令人誤以為某些佳麗好低分，勁唔公平。每次如有高分佳麗出現，大家都會嘩一聲。我響呢Part求其影左張相，竟然影到3號出黎，原來響呢度已經露出玄機。

9:15pm - 首個高潮出現，司儀宣布8強佳麗，3號同5號兩位冷馬被宣布入到圍時全場嘩然，當最後1位被宣布時，仲有2號同12號兩位熱門未入，好多人嗌2號，但最後竟由14號入左，全場即議論紛紛。

9:55pm - 歷屆港姐出場，唔明點解叫歐陽妙芝，個個都有冠戴得佢冇，畫面極為奇怪。圖中就係剛剛播出陳法蓉同袁詠儀既片段。

10:00pm - 做完一輪問答，第二個高潮黎到。當宣布國際親善小姐同最上鏡小姐時都係9號時，現場觀眾都有拍下手，大家都認為賽果合理。但宣布5名時，當宣布14號趙嘉迪入到，全場即勁噓，可能大家都認為佢個樣唔掂答問題又唔得都入到5名，勁唔合理。宣布最後一位入時，全場人勁嗌7號，好彩最終真係入7號，唔係D噓聲可能仲勁。

10:15pm - 訪問眾佳麗心情，14號又無啦啦提D人以為佢係靠屋企先可以到呢個位，但講一半又冇講落去，好心啦都冇人特登提你就咪鬼自己又提啦，攞黎衰。9號講D野好感動，大家都拍手鼓勵佢。

10:24pm - 季軍宣布為7號周美欣，大家都覺得合理。其實佢最高都只係可以去到呢個位，因為佢表演太細路女，太多小動作，根本冇可能選佢做冠軍。

10:26pm - 全場都認為9號會拎冠軍，所以宣布亞軍時，大家都嗌4號，希望整個3甲組合個樣可以好少少。但司儀宣布亞軍為9號時，全場人O哂咀，大家都好驚唔知邊個會做冠軍。

10:29pm - 要宣布冠軍喇，台上剩返3個 5'4"既product，全場都嗌4號咁濟，因為實在太不忍3號或14號拎冠軍。當曾志偉宣布3號拎冠軍個一刻，全場靜左1秒，之後就噓聲四起，聲浪之大達100分貝。搞錯、離譜等詞語此起彼落，有D觀眾仲即刻起身走，我地一班Pageant Fan就down到冇聲出。

10:45pm - 大家都冇乜野傾，因為心情實在太失望，大家求其影左幾張相就走，之後就去左尖沙咀食野。

最後離譜賽果：

冠軍 - 3號 張嘉兒

亞軍 - 9號 王君馨

季軍 - 7號 周美欣

國際親善小姐 - 9號 王君馨

最上鏡小姐 - 9號 王君馨

2007港姐 --- 賽前預測

受到友人Fun既影響，蠢蠢欲動想試下寫個blog，跟朋友或網友分享一下自己既生活體驗。但因為又忙又懶既關係，擾擾攘攘搞左成年先至肯開始寫第一篇blog，到今日我個blog終於面世喇!

話時話，同朋友商討第一個blog應該寫乜。既然我咁鍾意睇選美，港姐又就快舉行，順理成章呢個topic會成為我既第一篇文章。

仲有一日就舉行港姐喇，想響度做個小小既賽前預測。

自從86年開始，港姐就開始受著"3年詛咒"既困擾，即每3年就質素奇差。86,89,92,95,98,01,04都係較差既年份，尤其92,95,98,01呢四屆真係歷屆之"底" ...。今年07適逢又係"3年詛咒"，但係有返"逢7尾必好"頂一頂 (77,87,97年都質素奇佳)，所以今年質素都未算係谷底，只可以用plain黎形容。但05年開始d海外招募既佳麗都好唔掂，今年都唔例外，再係咁落去TVB應該考慮下取消呢個勞民傷財既所謂招募。

好喇，係時候review下每位佳麗既"競爭力"。


1號 麥皓兒 入三甲指數: 10%
屬非常落力之佳麗，又仆傷又曬暈咁，但成個款似展翅學員多過港姐。殺傷力欠奉，睇怕都係陪跑居多。


2號 何傲兒 入三甲指數: 90%
論樣貌係本屆黎講屬超哂班，再加上大會剛剛重新公布其身高由5'5"改為5'6.5"呢個標準冠軍身高，真係天都幫埋佢。加上談吐以佢年紀黎講尚算ok，決賽夜穩打穩紮應該三甲有望。但其18之齡唔多唔少係佢奪冠既絆腳石。


3號 張嘉兒 入三甲指數: 20%
唔掂海外佳麗之一，樣貌身型皆屬無甚睇頭，加上3號呢個盲門號碼，情況未許樂觀。


4號 黃智雯 入三甲指數: 70%
官方相唔得，但其他相及上鏡均ok。睇港姐奧運任務發覺其言談都幾得體，如身高可多兩吋就甚為perfect。

5號 鄭瑩瑩 入三甲指數: 30%
本入及網友均視為bottom 6之鐵腳佳麗，但在TVB的官方投票中常名列前5名，賽果令人"R"頭。

6號 王卉霖 入三甲指數: 70%

甫出場即被冠以翻版陳法拉之名，質素不俗。參選以來一直都頗為低調，但上周被踢爆其提名人為何鴻燊個姨甥個老婆，加上原來係99落選港姐王啟翎個妹，入圍指數又再攀升。

7號 周美欣 入三甲指數: 90%

本屆最高佳麗，加上淡淡定定有壓台感，成初選時評判及各網友既首選之一。近兩年既季軍都係當屆最高既佳麗，唔知周美欣會唔會食住呢個勢呢？

8號 梁詠詩 入三甲指數: 0%
Plain指數10000點，歷屆最plain既海外佳麗可能係佢! 冇樣冇身材冇身高冇新聞....，名符其實百"冇"佳麗，如能入圍真係全香港都會成地眼鏡碎。

9號 王君馨 入三甲指數: 60%
挾全美華埠小姐亞軍之銜再戰港姐，選美經驗豐富。樣子有少少exotic feel，鬼妹仔既佢每次說話都盡量以廣東話作答呢一點予人好感，但有時講野好似就快斷氣。

10號 黃彥欣 入三甲指數: 50%
樣貌甚唔穩定，對住鏡頭唔算好自然，但整體都過得去。參選以來最大單新聞就係被某周刊踢爆佢去上司屋企過夜。

11號 黃頌妍 入三甲指數; 40%

有漲爆谷祖琳之稱，算係4位海外佳麗裡面較為睇得下既一個，笑容亦親切。其5'8"身高亦係其可取之處。

12號 李潔瑩 入三甲指數: 80%

港姐面試實錄第一個入圍，樣貌談吐均非常大方，如穩穩陣陣又撞o岩係評判杯茶，有機會拎個后冠返屋企。但有時個樣有少少cool或目無表情，呢d真係做港姐既大忌。

13號 梁嘉欣 入三甲指數: 0%
講樣就真係"包底"，但談吐不俗且幾有性格。港姐面試實錄時以首輪入選已經甚為爆冷，相信決賽夜好難再黎一次。

14號 趙嘉廸 入三甲指數: 60%
前藝員梁小玲個女，因此身份而成為傳媒焦點，但個人實力欠奉，響美國high school求其搵個ABC都已經係咁既款，但觀眾緣不錯，有機成為國際親善小姐。

15號 高可庭 入三甲指數: 50%
張官方相勁呃到人，有貨不對辦之嫌，唔知有冇人會因此向廣管局投訴。身材卻屬有料之人，談吐亦大方，但笑起來好似冇左一隻牙，甚為有礙觀瞻。

16號 鄭慧貞 入三甲指數: 0%
一見即暈個類，"非洲Sammi"呢個雅號已經俾多左佢，好彩佢份人就唔算騎呢。

鳴謝Chinese Pageant Picture提供相片