恭喜王君馨勇闖15強及奪得友誼小姐!!

王君馨手持"友誼小姐"獎座


王君馨進入十五強及穿上民族服裝

恭喜恭喜!! 港姐亞軍王君馨代表香港參選10月15晚在東京舉行的2007年度國際小姐競選，打入top 15及勇奪友誼小姐名銜!! 其實她能獲Miss Friendship並不意外，因她本身是位十分熱情既佳麗，而且懂西班牙文及國語，加上食住之前幾年港姐都獲友誼小姐呢個勢(02胡家惠，04符思思，05朱慧敏，06呂慧儀)，故呢個獎佢真係拎硬咁濟!! 但入選15名就幾意外，佢係自1985王愛倫後首位在這比賽打入15強既佳麗(又咁o岩兩位都姓王，參選港姐時都係9號)!! 不過睇返佢選當晚既狀態奇佳，真係入選有理!!

在此祝福港姐在國際選美上再創佳績!!

沉迷Facebook!

其實好幾月之前已經陸陸續續收到朋友邀請玩facebook，但自己本身已經有friendster，覺得冇乜新意，所以都冇乜點理會。最後受到一位朋友猛力推介下便登記! 嘩一玩就收拾唔到，facebook勝在夠互動，好多野可以send俾朋友又有好多得意既animation同game俾你玩，好似我而家都同朋友響上面玩scrabble，十分過癮! 大家不妨試下啦!

去哈囉喂玩到頭赤!

原來海洋公園同我一年出世架喎，嘻嘻!

今年同一班舊同事去海洋公園哈囉喂，雖然都唔係第一次去，但心情都甚為亢奮。四點鐘就約定在金鐘等，已經人頭湧湧，巴士站的士站擠滿哂長龍。去到門口已經好多人，而且非常翳焗!! 拎左個地圖一睇，嘩有廿幾個"猛鬼"景點，以為好荀，點知有d係機動遊戲改個鬼味d既名就當係，甚為搵笨!!

呢個"一見發財"扮相都算幾有誠意

我地第一個玩係"鍾旭捉鬼"，我地拎快pass就好快入到，但慢pass果d見到個牌話要等120分鐘，痴線!! 一入到去前面個兩位妹妹仔嚇到彈返轉頭where住我一齊行。講真一齊行冇所謂，唔好where住我個袋先得架，where到成個袋dur哂!!! 呢個鬼屋都幾大，都要行一陣先行完!! 開頭都有d戰戰兢兢，但因為都唔係第一次玩，新鮮感冇乜，玩下玩下就慣左果種感覺。

之後排隊搭纜車等左半個鐘，好熱!!

去到山另一邊玩既野都差唔多，我地一邊玩鬼屋一邊入下d乜鬼水母館鯊魚館睇，唔知係咪一冷一熱又冇野落肚，撞到我有d頭暈身慶!! 好彩都挨到11點半散場，出去銅鑼灣食返個豬扒飽又冇乜事喎!!

鬼影幢幢既凶宅

總括黎講如果你未玩過又有成班friend柴娃娃一齊，都未嘗唔可以去試下既，但一定要買快pass，因為排兩粒鐘隊玩一間鬼屋真係死得!! 不過聽講d快pass飛就快賣哂，要買趁早喇!!

再見喇，我的好友Susanna!

Susanna話返加拿大講左成半年，唔經唔覺到左佢真係要離開既日子，雖然我萬分唔捨得，但佢既屋企人好需要佢，所以我都十分支持佢返去，祝佢係個邊事事順利，佢同佢既屋企人都身體健康啦。

sorry我已經叫自己送機時唔好喊，但都忍唔到喊左出黎，真係好耐冇試過情緒咁激動。

怪聲怪氣的少女

成世仔都未試過響套戲第一日上畫就去睇，今次終於破處第一次，但係竟然差d訓著。

我本身都幾鍾意睇日本動畫，亦都ok buy粵語配音，但今次衛蘭配音真係頗為惡頂。佢本身廣東話已經咬字唔係好正，仲成日都係發果幾個音 "呀?? 依?? 哦??"，聽到有d煩厭。再加上無甚感情既語氣(尤其係獨白之類)，相信係構成整套戲沉悶非常既原因，所以話唔係撈開個瓣就真係咪掂，盞吃力不討好。

成套戲劇情其實都ok，但因為講佢超越時空，所以好多片段都重複，好似電車衝緊黎個幕出左大約十次，動畫黎講有d搵笨(因為畫少左野)。而故事內容亦很"故事"，唔似得宮崎峻d戲咁多message俾觀眾。

宣傳方面真係要slap，好地地做乜要用"畫功媲美宮崎峻"作招徠呢? 叨人光真係電影宣傳既大忌。

香港先生令我捏一把汗!!

2007香港先生 - 7號袁偉豪

自從睇完港姐後個心都因為賽果而耿耿於懷好一排，今次選港生，開頭真係覺得 "唔係嘛，又黎個騎呢賽果呀?"，6號呢個小白臉同11號大陸鄭伊健兩個勁高票數，真係好驚就咁跑出。不過最後2號後來居上，而大路7號袁偉豪又拎到總冠軍，個心先平伏返落黎。

盛年組冠軍 - 11號 胡志偉

少年組冠軍 - 2號 趙國東

成個show氣氛都幾緊湊，冇乜冷場。佢地既talent比我想像中好，尤其臨尾既馬戲團表演，睇得出係俾心機練過。

總係覺得TVB有心玩張可頤，岩岩出返黎就咪鬼叫佢做LIVE啦，仲要俾咁多資訊性既稿佢讀(如匯應通)，真係攞佢條老命。佢出場亦冇乜火花，變成可有可無既司儀。

一晚普通家常便飯

星期日蕃茄叫左佢老死們黎屋企食飯，本來係平平無奇幾碟餸，因為份量之大，令我有個衝動要拍低落黎。



呢個飯盒係額外煮俾蕃茄老死第二朝lunch帶飯，嘩裡面有12隻雞翼再加乳豬再加菜呀"kick lick gwa la"加成底飯，究竟點樣可以消化到呢?? 實在蔚為奇觀!!



其他餸既size (除菜外)亦都非常大，拍得住Dan Ryan!! 雞翼約30-40隻，蝦斤半，乳豬兩盒，粉葛鯪魚湯一大煲!! 但你地估下我地有幾多人食?? 係4大位咋.....


最後大家一齊欣賞無線生活台既志雲飯局，今次既嘉賓係狄波拉。每次見到狄波拉我就諗起吳君如響一個電台節目講過關於佢既笑話; 話說有一個裝冷氣既技工去左狄波拉屋企整冷氣，咁去到時有個女人開門俾佢，佢入到去見到成屋都係狄波拉同佢屋企人既相，同埋聽到佢把聲，但睇勻全屋都唔見狄波拉本人喎，究竟點解呢?? 聰明既你一定諗到啦!!