再見喇，我的好友Susanna!

Susanna話返加拿大講左成半年，唔經唔覺到左佢真係要離開既日子，雖然我萬分唔捨得，但佢既屋企人好需要佢，所以我都十分支持佢返去，祝佢係個邊事事順利，佢同佢既屋企人都身體健康啦。

sorry我已經叫自己送機時唔好喊，但都忍唔到喊左出黎，真係好耐冇試過情緒咁激動。

怪聲怪氣的少女

成世仔都未試過響套戲第一日上畫就去睇，今次終於破處第一次，但係竟然差d訓著。

我本身都幾鍾意睇日本動畫，亦都ok buy粵語配音，但今次衛蘭配音真係頗為惡頂。佢本身廣東話已經咬字唔係好正，仲成日都係發果幾個音 "呀?? 依?? 哦??"，聽到有d煩厭。再加上無甚感情既語氣(尤其係獨白之類)，相信係構成整套戲沉悶非常既原因，所以話唔係撈開個瓣就真係咪掂，盞吃力不討好。

成套戲劇情其實都ok，但因為講佢超越時空，所以好多片段都重複，好似電車衝緊黎個幕出左大約十次，動畫黎講有d搵笨(因為畫少左野)。而故事內容亦很"故事"，唔似得宮崎峻d戲咁多message俾觀眾。

宣傳方面真係要slap，好地地做乜要用"畫功媲美宮崎峻"作招徠呢? 叨人光真係電影宣傳既大忌。

香港先生令我捏一把汗!!

2007香港先生 - 7號袁偉豪

自從睇完港姐後個心都因為賽果而耿耿於懷好一排，今次選港生，開頭真係覺得 "唔係嘛，又黎個騎呢賽果呀?"，6號呢個小白臉同11號大陸鄭伊健兩個勁高票數，真係好驚就咁跑出。不過最後2號後來居上，而大路7號袁偉豪又拎到總冠軍，個心先平伏返落黎。

盛年組冠軍 - 11號 胡志偉

少年組冠軍 - 2號 趙國東

成個show氣氛都幾緊湊，冇乜冷場。佢地既talent比我想像中好，尤其臨尾既馬戲團表演，睇得出係俾心機練過。

總係覺得TVB有心玩張可頤，岩岩出返黎就咪鬼叫佢做LIVE啦，仲要俾咁多資訊性既稿佢讀(如匯應通)，真係攞佢條老命。佢出場亦冇乜火花，變成可有可無既司儀。

一晚普通家常便飯

星期日蕃茄叫左佢老死們黎屋企食飯，本來係平平無奇幾碟餸，因為份量之大，令我有個衝動要拍低落黎。



呢個飯盒係額外煮俾蕃茄老死第二朝lunch帶飯，嘩裡面有12隻雞翼再加乳豬再加菜呀"kick lick gwa la"加成底飯，究竟點樣可以消化到呢?? 實在蔚為奇觀!!



其他餸既size (除菜外)亦都非常大，拍得住Dan Ryan!! 雞翼約30-40隻，蝦斤半，乳豬兩盒，粉葛鯪魚湯一大煲!! 但你地估下我地有幾多人食?? 係4大位咋.....


最後大家一齊欣賞無線生活台既志雲飯局，今次既嘉賓係狄波拉。每次見到狄波拉我就諗起吳君如響一個電台節目講過關於佢既笑話; 話說有一個裝冷氣既技工去左狄波拉屋企整冷氣，咁去到時有個女人開門俾佢，佢入到去見到成屋都係狄波拉同佢屋企人既相，同埋聽到佢把聲，但睇勻全屋都唔見狄波拉本人喎，究竟點解呢?? 聰明既你一定諗到啦!!

Shake 'em Buns

上星期五我去左FUN極力推介既一間Shake 'm buns食飯。呢間舖頭非常西化，主力係食Burger同Fries咁，格局casual，可以"一條欄"食完個飽走得又或約三五知己傾下食下，真係豐儉尤人。我地4人約8點去到，唔駛點等，全程包括買野飲同野食都係自助，我好鍾意食芝士所以揀左個menu寫話好cheesy既Cush'in in the Push'in，但個飽黎到原來都係一塊仔芝士，有d名不符實，而且沒有薯條跟(要另叫)，所以食完都唔覺好飽，而飲品亦都非常普通，埋單飽跟野飲盛惠$70大元，同樣價錢我會揀Triple O's喇。

呢個就係Cush'in in the Push'in喇，唔好以為好食到"殘眼"，係小弟呢排隻眼做左手術姐。

之後我地成班約左一個來自新加坡既Pageant Fan見面，這位朋友係好典型既坡仔，高高大大加燦爛笑容同埋坡式廣東話，大家都非常受落。聽說呢位朋友好少機會會再黎香港，呢d就叫萍水相逢吧。臨別時大家都影張相留念，MSN再見吧!!

猿人襲地球 (警告!! 慎入!!)

我已經好多年冇買過Yes呢本雜誌睇，今日在forum偶然睇到一個關於Yes既活動，原來係校花同校草選舉。估唔到過左咁多年Yes仍然搞緊呢類型既活動，我亦都八一八click入去睇下，嘩一睇，真係嚇死人咩，唔該下次加警告字樣啦。

首先睇下一班較為 "似人樣"既校花先: (可以click大睇清楚)


驟眼睇成班都算不過不失，4,5,12,15都幾好，尤其15有171咁高，個樣仲好過今年某些港姐候選佳麗添，如果讀多幾年書去選真係有機贏架。其他有d衰在唔自然，最恐都算係3號，扮日本妹又唔係kawaii又唔算，唔知想點。

好喇，睇完校花，就要睇下我地偉大既校草喇 警告! 熊出沒主意!


一句講哂: 成班大佬想點呀? 6同18真係.... 人妖都好似好過佢!!
6號既專長: set頭................ (冇野好講)
18號既專長: 搞gag.................... (冇野好講)
8同16係咪兩兄弟?? 對眼似到
19號.... Kary上身??

真係好多謝Yes再次帶俾我好有校園時代feel既"歡樂"。

掟壞人

上星期六因賀朋友禮生日，成班走左去金鐘PP Dan Ryan食飯。這位禮兄同我都好鍾意食美國式餐廳，所以佢呢幾年生日黎黎去去都係Ruby Tuesday，Dan Ryan，又話者係Outback呢幾度慶祝。

我鍾意呢類美國餐廳既原因係每次去都可以俾你感受到咩叫"大吃大喝"，因為佢每碟菜既serving都好大，飲品又有得免費添飲，所以每次都食到捧住個肚走。而且座位舒適又冇趕住翻枱既感覺，所以如有三五幾個朋友gathering呢度都係必然首選。

今次點既菜都係食慣食熟，不外乎Caesar Salad，Lasagna，Buffalo Wings，Ribs之類，可謂無甚驚喜，但都食得好enjoy。由於顧住傾偈，赫然發現枱上有兩碟意份已經清哂，實在為之氣憤。到最後叫Dessert時，本來我係揀左Brownie，但朋友祖竟然講左一句"唔好啦，呢隻咁既brownie好鬼甜，簡直係鬼佬蓮蓉!!"，此語一出全場爆笑，相信都會成為我地group人既經典，當然最後都o係佢強烈抗議下冇叫到。

Dan Ryan三間分店我都食過，呢間service就算幾好，而尖沙咀果間因人多關係，如果book八點要9點半交枱，食呢d野點叫人個半鐘食完呀?? 有d離譜。如果要我排響香港有既5間同類型連鎖餐廳，我會咁排:

第一位: Ruby Tuesday - 食物質素同service都keep住幾好，最衰海港城間舖執左，所以少去左。呢間舖d位好舒服好有privacy個view又靚，執左真係可惜。

第二位: Dan Ryan - 整體都幾好，但要限人時間交枱(尖咀店)就真係有少少drawback。

第三位: Outback - 基本上都ok，但食物選擇較少，service亦冇前兩間咁pro。

第四位: Fat Angelo - 呢間衰唔穩定，蘇豪店同尖沙咀店不論食物或服務質素都可以用天淵之別黎形容，如果想去，奉勸大家唔好去尖沙咀店，盞成肚氣。

第五位: Shooters 52 - 以前就幾好，而家執下又一間，食物水準大不如前喇!!

最後當然唔少得響門口影張相呢個指定動作啦。